الجمعة، 10 أكتوبر 2008

مكنتش أعرف ان السنة بتعدى بسرعة كده


ناس كتير دعتلى علشان عمرو يرجعلى بسرعة اوى

ومكنتش أعرف ان الدعوة هتستجاب بسرعة كده

كان ميعاد سفره النهاردة يمشى بعد الصلا تقريبا

وانا كنت هاسلم عليه امبارح طبعا

وكانت لحظة متعبة أكتر مما كنت اتخيل

وبعد ما مشى كنت تعبانة لدرجة انى مش قدرت أقوم من السرير


مكنتش قادرة اتحرك مكنتش بصحى غير علشان أكلمه بس

طبعا قضينا ليلة زى الفل


المهم خلاص الصبح طلع والصلا خلصت وعمرو نزل وراح المطار

وبدات استسلم للأمر الواقع

فضلت مستنياه يكلمنى من هناك زى ما قالى لكن مش اتصل


وشوية ولقيت أمى بتقولى انهم رايحين قريب من بيت عمرو

وقالتلى تعالى اقعدى معاهم حبة ونبقى نعدى عليكى ناخدك


وفعلا كان ده السبب الوحيد اللى يخلينى اقوم من السرير

وروحتلهم وقعدت معاهم كنت مبسوطة انى معاهم ويمكن مهونة عليهم شوية


الساعة جت خمسة وده ميعاد الطيارة لقينا تليفون على موبيل والد عمرو

افتكرناه اى حد


بس المكالمة كانت غريبة اوى


ايوه ازيك يا عمرو

انت جاى يعنى

راكب تاكسى

طب والشنط

طب خلاص تعالى هنستناك


اه الكلام بالبساطة دى

تنحت طبعا وافتكرت عمو بيهزر اصل ما ينفعش

وهو بيتكلم ببساطة بجد ويقولى والله جاى


حسيت وقتها ان روحى رجعتلى ومعرفتش اخبى ابتسامتى وفرحتى رغم اننا كنا مصدقنا اليوم عدى خلاص

وبعد شوية الباب خبط


وسمعت صوته

ايه ده

ده جه بجد


طبعا داخل مكشر ومتضايق وزهقان من اللى حصل طول اليوم

بس اول ما شافنى ابتسم اوى ولقيتنى بضحك اوى


يااه

هى السنة بتعدى بسرعة كده

ده رجعلى قبل ما يغيب


ليا نصيب اشوفه تانى واتكلم معاه

بجد كانت احلى مفجاة

هو اه مسافر بعد بكرة تقريبا

بس فى فرق كبير بين اليوم ده وده

حسيت انى ممكن ابقى متماسكة اكتر


اد ايه اللحظة الحلوة بتفرق كتيييييييييير

كان نفسى نستقر فى حياتنا ونبدا نتعود عليها

لكن قدرنا نعيش مع بعض هنا يوم كمان


فى لحظة واحدة كل حزنى اتحول فرح

وكل تعبى راح لما شفته


هو صحيح طلبت منه يجينى بسرعة

لكن مكنتش اعرف انه هايجينى بسرعة أوى كده


الحمد لله
ربنا يقدرلنا الخير على طول

هناك 16 تعليقًا:

الازهرى يقول...

صديقتى العزيزة

ارجوا ان اكون انا اول تعليق ولو مرة

ادام الله المشاعر بينكما جميلة وادام السعادة دوما وحقق امانيكم

اعجبنى للغاية مقطع
فى لحظة واحدة كل حزنى اتحول فرح
وكل تعبى راح لما شفته


فهو يدل على كم المكنون له داخلك

اهنئه بك

تحياتى
جئتك بناءا على دعوة صديقة فقررت البقاء ان سمحت لى

Sweet Violet يقول...

دايما يارب حزنك يتحول لفرح زى اللحظه دى

بجد حسيت قوى بفرحتك ودا دليل على صدق مشاعرك

ربنا يخليكوا لبعض يارب

و تتجمعوا دايما على حب

romansy يقول...

ايه المشاعر الجميله دى
مبروك عوده عمرو بالسلامه
وحمد الله على سلامته
وعوده الروح ليكى بالسلامه

ويارب يخليكوا لبعض

shimaa يقول...

الأزهرى

لم أقدر دعوات الناس لى الا بعد خطبتى فكم أحببت دعوات الناس لى بدوام ما بيننا واتمام الله لنا على خير ان شاء الله


جزاك الله خيرا على دعواتك

المكنون له داخلى ليس بقدره فهو رائع بحق

لا اسمح لاحد بالرحيل ان جاءنى فقط احاول ان يستمتع بوقته

دمت بخير

shimaa يقول...

ضد التيار

لا أعلم لماذا أجد بكلماتك راحة أحس معك بألفة
دعواتك لى جميلة جدا جزاك الله عنها كل خير

واذاقكى مثل تلك السعادة دوما ان شاء الله

دمتى بخير

shimaa يقول...

رومانسى

هو مش جه اوى هو اصلا لسه مش سافر
بس ان شاء الله يسافر بالسلامة ويرجعلى بسرعة

علشان السنة دى هاتبقى بلا حياة

المشاعر الجميلة دايما بتكون جوانا وبتخرج بس للى يستاهلها

دمت بخير

Hanan Said يقول...

ياااااااااااه قد ايه البوست ده فرق معايا كتير اووووووووووووووي
لاني النهارده كل حاجه بتقع قدام عيني بتخليني اعيط
انا قارئه جديده لمدونتك
ويمكن مش اعرفك ولا اعرف عمرو
بس قلبي فرح ليكي بجد والله بفرحتك
ربنا يكرمكم ببعض ..ويباركلكم في بعض
يوجمعكم بالخير ديما يارب
ويجعل ايامكم كلها فرح وسعاده
بجد انا سعيده جدااااا بسعادتك
ويارب السنه بجد تعدي بسرعه ويكتبله الخير ان شاء الله
تحياتي ليكي
وان شاء الله اكون مداومه على زيارتك
ونسمع عنكم كل خير

كـــيــــــــارا يقول...

شوشو حبيبتي

ربنا يفرحك دايما يارب

ويهون علليكي اللي جاي

ربنا مايحرمكم من بعض ابدا بدعيلك اهو والفجر علي ادان

mohamed ghalia يقول...

الحمد لله إنى السنة عدت بسرعة كده
بس برده لسه فى سنة جاية لما يسافر بعد بكرة
ربنا يجمعكم دايما
تقبلى تحياتى
دمتى بود

shimaa يقول...

حنان سعيد

يارب اعرف اوصلك السعادة دايما
وان شاء الله هاعرفك الاخبار الحلوة ان شاء الله

ويارب اشوف كتير فى المدونة
اد ايه سعادة الناس بتفرق وتزود سعادتى

دمتى بخير

shimaa يقول...

كيارا الجميلة

يارب ما اتحرم منك ولا من دعواتك ابدا يارب

حسيت ان دعوات الناس فرقت جدا معايا قبل كده

جزاك الله خيرا

shimaa يقول...

محمد

فرق كبير جدا بين سفره قبل كده وسفره الجاى الحركة ده فرقت معايا كتير

وان شاء الله بعد السنةالجايه دى ما تعدى ربنا يجمعنا على طول ان شاء الله

دمت بخير

قديسك مولاتى يقول...

شيماء
بجد لانى ماكنتش متابع قصة الحب لجميله دى .. اضطريت انى اقرا كل مدوناتكم وكنت بجد سعيد وانا بقراها ..
يمكن لانه نادر لما بشوف احساس اتجسد قدامى فى كلمات حسيت بصدقها
لدرجة انك فكرتينى باول خطاب حب كتبته من سنين طويلة واللى خلانى اسمى المدونة بتاعتى على اسم عنوان الخطاب واللى هو قديسك مولاتى .. يسعدنى انى اهدى لك كلمات الخطاب هدية منى ليك عشان تهديها لعمرو حبيبك وقوليلة ان الكلمات دى من قلبا كان مهجورا وعاد
قديسك مولاتى
عرفت انى لكى اكون قديسا يجب ان امنح للحياه ثلاث معجزات..فكانت معجزتى الاولى هى ان ارسم وجهك بين دفاترى فاخبرتنى اقلامى التعسه انها لاتملك سوى ان ترسم بشرا باحلام عاديه اما عن رسم الملائكه فهى لاتستطيع..وكانت معجزتى الثانيه هى ان اتغنى باروع قصائد الشعر من اجلك ,فاخبرتنى معاجم لغتى انها لاتملك بين طيات اوراقها اى مرادف لكلمات تستطع وصفك ,وكانت معجزتى الثالثه هى نسيانك فاخبرنى قلبى انه لن يموت بتلك السرعه .. فعرفت انى لست قديسا يامولاتى . فاانا لا اصنع المعجزات بل احتاج كل يوم الى معجزه جديده لكى احيا بدونك ....لكى احيا بدونك

shimaa يقول...

قديسك مولاتى

مش عارفة ارد اقولك ايه
شكرا على كلماتك هى رائعة بجد
وبتقدر تعبر عن االاحساس اللى بحسه بجد

احتاج كل يوم الى معجزه جديده لكى احيا بدونك .

عمرو اكيد هايقرا الكلام ده ومش عارفة هايرد ولا لا
بيقولى دايما انه مش بيقدر يعبر عن احساسه بكلمات
لكنه يهبنى احساسه واصنع انا منه كلمات

هو منبعى بحق

سعيدة بردك وارجو ان قصة الحب اللى انت وصفتها بجميلة تكمل على خير ان شاء الله

دمت بخير

blue-wave يقول...

هوا لسه فيه حب كدا؟
ربنا يوفقكم على طول يارب

shimaa يقول...

blue-wava

ادعيلى يفضل حبنا كده وربنا يتمملنا على خير

دمت بخير